你仲記唔記得細個時，手執零錢去便利店前扭蛋、開盲盒嘅快感？嗰種等開盒揭盲嗰下，好似等緊拆聖誕禮物咁緊張。今年復活節，PMQ就帶你重返呢段童年回憶——PMQ玩嘢祭 2025 強勢回歸！ 由4月18日至21日，PMQ元創方將搖身一變成為全港最型、最chill、最有創意嘅玩具便利店，一連四日玩盡所有玩具癮！
| PMQ玩具人盛典「玩嘢祭」 | |
| 日期： | 2025年4月18至21日 |
| 時間： | 中午12至晚上7時 |
| 地點： | PMQ元創方地面廣場 (個別活動將於特定場地進行) |
內容目錄
「膠」拾易便利店登場——買、睇、玩一Take過
咩係「膠」拾易？唔係淨係得膠袋咁簡單！
「膠」唔一定係貶義，今次「PMQ玩嘢祭」就將「膠」玩到出神入化。以玩具便利店為主題，重現懷舊便利店嘅裝潢，將盲盒、搪膠公仔、原創潮玩通通包裝成超型嘅「商品」，就連展示櫃都似模似樣，等你邊打卡邊掃貨！而「拾易」就寓意「容易收穫」，即係話你嚟一次，一定會滿載而歸。
來自五地30+品牌集合，潮玩大軍壓境！
活動集合超過30個品牌，唔止香港本地創作人，仲有來自澳門、廣州、首爾、新加坡等地嘅潮玩單位。無論你係日系癡線風、港式懷舊派、又或者係藝術雕塑型粉絲，現場都有你啱心水嘅精品。每個品牌都會展示佢哋最具代表性作品，仲有好多首度曝光、會場限定產品，夠晒獨特！
「PMQ玩嘢祭」四款限定潮玩登場
Club Babo – Flat Cat（麥精造型）
Club Babo一直以幽默怪趣風格見稱，今次推出嘅「Flat Cat」就特登換上懷舊港式麥精樽造型，夠晒創意又溫情，令你即刻回想起以前飲麥精嘅味道，完全係集童年回憶同設計感於一身。
Don’t Cry In The Morning – Soda 熊寶寶 BoBo
由香港藝術家打造，「Soda熊寶寶BoBo」唔止可愛咁簡單，仲係代表希望與溫暖嘅角色。佢喺便利店入面守護每一位客人，提醒大家就算生活幾攰、幾忙，記得每日都要微笑面對新開始。
LeeeeeeToy – 港式蛋撻造型 LEEEEEegg Tart
港式蛋撻+潮玩 = 呢個創意點子真係冇得輸。LeeeeeeToy今次將代表香港味道嘅蛋撻變成搪膠公仔，色香味俱全（雖然唔可以食，但真係睇得出好香！）。一見就笑，打卡一流！
Mr.Giraffe – 便利店職員版長頸鹿
Kafka Poon筆下嘅Mr. Giraffe變身便利店打工仔，身穿制服，眉頭緊皺嘅樣子真係好入戲。幽默演繹打工仔日常，令人睇完會心微笑，打工人唔講笑，買返個返去陪你OT！
「PMQ玩嘢祭」邊玩邊食夠晒開心
甜筒、果茶、爆谷、燒賣樣樣齊！
場內設有多個港味十足嘅美食品牌，絕對唔會餓親你。「半茶十里」推出小熊瓶果茶，超級打卡able；「甜筒暉」以Pantone色調製作雪糕三文治，視覺同味蕾雙重享受；「上水爆谷」帶嚟粟米肉粒、奶醬多味等特色爆谷，地道到不得了；而**「香料案內所」嘅辣椒油魚蛋燒賣組合**就更加辣得過癮！
「膠」級互動遊戲
盲盒搪膠甜品造型驚喜登場！
大會特別推出以便利店甜品造型設計嘅迷你搪膠盲盒公仔，由Club Babo等人氣單位合作推出，4款造型超可愛，仲有神秘隱藏版，開盒嗰下絕對令人尖叫！
玩任務賺印花＋爆炸糖做手信
參加現場遊戲或者消費滿指定金額，可以換領印花、即影即有自拍體驗，仲有PMQ玩嘢祭限量爆炸糖手信，玩完買完再拎手信返屋企，正爆！
「膠」友自由斟分享會 x 「膠」工課實戰工作坊
四大主題分享會，專業又有趣
由插畫師到玩具平台營運人，從角色設計講到收藏文化，呢場分享會內容實用得嚟又好玩。無論你係設計師、學生、玩具人或者純粹有興趣，總有一場啱你口味！
「膠」工課落手落腳玩，學整屬於自己嘅玩具！
想親手做出一件屬於你自己嘅玩具？無問題！一連串玩具雕塑、上色、初創工作坊等緊你報名，仲有STEM仿生賽馬機械工作坊，超適合親子一齊參加，寓教於樂！
「PMQ玩嘢祭」唔係淨係一場展覽，佢係一個讓你重新認識玩具意義嘅地方。喺度，你可以感受到創作者嘅熱誠，粉絲嘅支持，文化交融嘅魅力，仲有一份「唔怕老，繼續玩」嘅童心。如果你都想喺呢個復活節，搵返你心底嗰份童真——PMQ見！
常見問題
活動要收錢嗎？
主會場入場免費，部份工作坊或分享會需網上報名及付費。
有冇年齡限制？
無論大人細路都歡迎，仲有好多適合親子一齊參與嘅活動！
點買限定玩具？
場內設有各品牌攤位，會場限定商品每日限量發售，建議早啲嚟！
消費有冇額外優惠？
現場消費滿$100可換爆炸糖，儲齊印花仲可玩自拍體驗機！
